स्वास्थ्यसमाचार/लुम्बिनी प्रदेशका मुख्यमन्त्री चेतनारायण आचार्यले पाठेघरको मुखको क्यान्सर विरुद्धको खोप अभियानको शुभारम्भ गर्नु भएको छ ।
लुम्बिनी प्रदेश स्वास्थ मन्त्रालयले दाङको राप्ती गाउँपालिका स्थित आदर्श नमुना माध्यमिक विद्यालय लालमटीयामा आयोजना भएको कार्यक्रममा मुख्यमन्त्री आचार्यले खोप अभियानको शुभारम्भ गर्नु भएको हो । मुख्यमन्त्री आचार्य सहित स्वास्थ्यमन्त्री खेमबहादुर सारुले खोप अभियानमा सहभागी हुने स्वास्थ्यकर्मीलाई खोप बाकस हस्तान्तरण गरेपछि अभियान सुरु भएको छ ।
१० बर्ष देखि १४ बर्ष सम्मका किशोरीलाई लक्षित गरेर खोप लगाउन थालिएको छ । कक्षा ६ देखि १० सम्म पढ्ने किशोरीलाई खोप लगाइने छ । विद्यालय बाहिर रहेका किशोरीहरुलाई अभियानमा सहभागी गराउन ध्यान दिन आग्रह गर्नु भयो । रोग लाग्नै नदिनेगरी निरोगीता हुनेगरी स्वास्थ जीवनशैली अपनाउन आह्वान गर्नुभयो ।’
विद्यालयमा रहेका किशोरीहरूले खोप पाउने पूर्ण सुनिश्चित छ । तर, विद्यालय बाहिर रहेका किशोरीहरुलाई खोजेर अभियानमा अनिवार्य जोड्न जरुरी छ । उहाँहरु नछुट्ने गरी खोप लगाउन ध्यान दिनुपर्ने मुख्यमन्त्री आचार्यले भन्नुभयो–’लुम्बिनी प्रदेश सरकारले बार्षिक करोडौं रुपैयाँ क्यान्सरको उपचारमा सहयोग हुदै आएको छ ।
लुम्बिनी प्रदेशका २ लाख ९० हजार एक सय २४ जना किशोरीलाई खोप लगाउने लक्ष्य छ । आवश्यक पर्ने खोप सबै सम्वन्धित खोप केन्द्रहरुमा पठाइएको स्वास्थ्य मन्त्रालयले जनाएको छ । प्रदेशका १२ जिल्ला मध्ये सबै भन्दा धेरै रुपन्देही जिल्लाका ६१ हजार २ सय ३१ किशोरीलाई खोप लगाउने लक्ष्य छ । त्यसपछि दाङ जिल्लामा ४२ हजार ६७ जना, कपिलवस्तुमा ३९ हजार पाँच सय २५ जना किशोरीलाई खोप लगाउने लक्ष्य राखिएको छ ।
सबैभन्दा थोरै रुकुम पूर्वमा तीन हजार पाँच सय ९१ र अर्घाखाँचीमा नौं हजार तीन सय ३४ जना किशोरीलाई खोप लगाउने लक्ष्य राखिएको हो । पाल्पामा १२ हजार ५ सय ६६, गुल्मीमा १३ हजार ४६, नवलपरासी पश्चिममा १८ हजार ७ सय ९३, रोल्पामा १५ हजार ४ सय ७८, प्युठानमा १६ हजार तिन सय ३५, बर्दियामा २४ हजार ६५ जना र बाँकेमा ३४ हजार ९३ जनाले खोप लगाउने लक्ष्य राखिएको छ ।
स्वास्थ्यमन्त्री खेमबहादुर सारुले प्रदेश सरकारले क्यान्सर, मृगौला र मुटुको उपचारमा सहयोग गर्न गत बर्ष १३ करोड रुपैयाँ गरेको र क्यान्सरको उपचारकालागि मात्रै ९ करोड खर्च भएको बताउनु भयो ।
प्रदेश सरकारले उपचारकालागि दुई लाख रुपैयाँ सहयोग गर्दै आएको छ । अव रोग लागेपछि मात्रै उपचार गर्ने भन्दा रोग लाग्नै नदिनेगरी ध्यान दिन आह्वान गर्नु भयो ।‘नसर्ने रोगका कारण नागरिकहरु पिडित हुनुपर्ने अवस्था छ । राज्यले आफ्नो तर्फबाट गर्ने सहयोग गरिरहेको छ’उहाँले भन्नुभयो,‘अव रोग नलाग्ने गरी स्वस्थ जीवनशैली अपनाउन जरुरी छ ।’
लुम्बिनी प्रदेशमा बार्षिक दुई हजार जना व्यक्ति क्यान्सर रोगको उपचारकालागि सहयोग लिन स्वास्थ्य निर्देशनालयको सम्पर्कमा आउने गरेका छन् । स्वास्थ्य सचिव डा.बासुदेव उपाध्यायले दुई चरणमा खोप लगाउन थालिएको र लक्षित उमेर समुहका किशोरीहरुलाई अनिवार्य खोप अभियानमा जोडिने जानकारी दिनुभयो ।
राप्ती गाउँपालिकाका अध्यक्ष प्रकाश बिष्टको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा सम्पन्न उद्घाटन कार्यक्रमको सहजिकरण स्वास्थ्य निर्देशनालयका खोप फोकल पर्सन गोकर्ण गिरीले गर्नु भएको थियो ।
प्रतिकया दिनुहोस्