स्वास्थ्यसमाचार/ स्वास्थ्य निर्देशनालय लुम्बिनी प्रदेशका निर्देशक रोशन लाल चौधरीले आयुर्वेद चिकित्सालयको सेवा विस्तारमा बजेट अभाव र विषयविज्ञ जनशक्तिको कमी ठूला चुनौती बनेको बताएका छन्। उनले नीति निर्माण तहमा लबिङ नपुगेकाले आयुर्वेद क्षेत्र ओझेलमा परेको उल्लेख गरे।बुटबलमा भएको एक कार्यक्रममा बोल्दै चौधरीले यस्तो बताएका हुन ।
उनका अनुसार आयुर्वेद चिकित्सालयतर्फ केवल जनशक्ति नै नभएर आवश्यक बजेटसमेत छैन। “यो क्षेत्रमा बजेट विनियोजन र नीति कार्यक्रम बनाउन नीति निर्माण तहमा लबिङ पुगेन,” चौधरीले भने, “विषयविज्ञता हासिल गरेका जनशक्ति पनि छैनन्। भएका सीमित जनशक्तिलाई बजेट निर्माण तहसम्म ध्यान दिन आग्रह गरेका छौं।”
चौधरीले आयुर्वेदका केही कार्यक्रमलाई नागरिकहरूले निकै रुचाएका भए पनि ती कार्यक्रमलाई जनस्तरसम्म लैजान बजेट आवश्यक हुने बताए। राजनीतिक नेतृत्वलाई दबाब दिँदै उनले भने, “जनताको आकर्षण देखिएका कार्यक्रममा सरकारले पनि ध्यान दिनुपर्छ। अहिले संघ र प्रदेश दुवै सरकारको बजेट पर्याप्त छैन। नेतृत्व तहसम्म लबिङ पुर्याउनुपर्छ।”
चार वर्षअघि निर्देशनालयमार्फत आयुर्वेदतर्फ १५–२० वटा कार्यक्रम सञ्चालन गरिएको भए पनि त्यसपछि कुनै पनि कार्यक्रम सञ्चालनमा नरहेको उनले जानकारी दिए। ती कार्यक्रम धेरै जिल्ला पुग्न सफल भए पनि पर्याप्त बजेट अभावले निरन्तरता दिन नसकिएको उनको भनाइ छ।
प्रतिकया दिनुहोस्