स्वास्थ्यसमाचार / लुम्बिनी प्रदेशका आर्थिक मामिला तथा योजनामन्त्री धनेन्द्र कार्कीले दुर्गममा डाक्टर जान नमान्ने रोग भएको बताएका छन् ।
बिहीबार गुल्मी अस्पताल तम्घासमा नसर्ने रोगको छुट्टै क्लिनिक (पेन प्लस क्लिनिक) को उद्घाटन गर्दै मन्त्री कार्कीले विशेषज्ञ डाक्टर दुर्गममा जानै नमान्ने रोग भएको बताएका हुन् ।
कार्कीले गुल्मी अस्पतालमा विशेषज्ञ डाक्टर अभाव रहेको प्रसंगमा गुल्मीमा अलिक कम भए पनि रुकुम र रोल्पामा डाक्टर जानै नमान्ने गरेको बताए । ‘जिल्ला अस्पतालहरूमा विशेषज्ञ डाक्टरको अभाव छ,’ उनले भने, ‘दुर्गममा डाक्टर नजानै रोग नै भएको छ ।’
कार्कीले यस विषयमा प्रदेशबाट जनशक्ति पदपुर्ति गर्ने काम र विशेषज्ञ डाक्टर ग्रामीण भेगमा जानैपर्ने मापदण्ड बनाउने बताए । उनले अहिले पनि छात्रवृत्तिमा पढेपछि जिल्ला अस्पतालमा सेवा गर्नुपर्ने मापदण्डले केही कमी भएको बताए ।
गुल्मी अस्पतालमा विशेषज्ञ डाक्टरको दरबन्दी १० जना रहे पनि अस्पतालमा दरबन्दीअनुसार विशेषज्ञ डाक्टर नै छैनन् । तर १ छात्रवृत्ति करार, १ अस्पताल विकास समिति र २ मेडिकल अधिकृत तर योग्यता विशेषज्ञ भएकोले अस्पतालमा ४ विशेषज्ञ डाक्टर छन् ।
पेन प्लस क्लिनिक युनिसेफ नेपालको आर्थिक सहयोग तथा काठमाडौं इन्स्टिच्युट अफ चाइल्ड हेल्थको साझेदारीमा गुल्मी अस्पतालमा स्थापना भएको काठमाडौं इन्स्टिच्युट अफ चाइल्ड हेल्थका डा। सन्दिपा कार्कीले बताइन् ।
पेन प्लस एउटा परियोजना हो । यसले मुख्यगरी नसर्ने रोगको पहिचान गरि उपचारमा समन्वय, सहजीकरण र सहयोग गर्दछ । यसले मुख्यगरी मुटु रोग, बाथरोग, मधुमेह, जन्मजात रोगलगायतका बिरामीलाई सहयोग पुर्याउनेछ ।
प्रतिकया दिनुहोस्