‘लू’बाट बच्न स्वास्थ्य तथा जनसंख्या मन्त्रालयको आग्रह

स्वास्थ्यसमाचार/स्वास्थ्य तथा जनसङ्ख्या मन्त्रालयले तातो हावा ‘लू’बाट बच्न सर्वसाधारणलाई आग्रह गरेको छ । मन्त्रालयले तराईमा तातो हावासँगै ‘लू’ चलेकाले सबैलाई बच्न आग्रह गरेको हो ।

‘लू’ले गर्दा मुटुको चाल तीव्र हुने, श्वासप्रश्वासमा समस्या हुने, रक्तचाप घट्ने, पसिना निस्कने, टाउको अत्यधिक दुख्ने, चक्कर लाग्ने, ज्वरो आउने जस्ता समस्या देखिने गर्दछ ।

शुक्रराज ट्रपिकल तथा सरुवा रोग अस्पतालका प्रमुख कन्सल्ट्यान्ट फिजिसियन डा विमल चालिसेले गर्मी बढेसँगै तराईमा तातो हावा चलेर ‘लू’ लाग्ने गरेको बताए । धेरै तातो हावाले मस्तिष्कमा असर गर्ने भएकाले तातो हावा चलेका बेला दिउँसो घर बाहिर ननिस्कन आग्रह गरे ।

धेरै तातो हावा चल्यो भने मस्तिष्कलाई असर गर्दछ, मानिसलाई बेचैन बनाउने गर्दछ, उनले भने, शरीरमा पानीको मात्रा कम हुँदा मिर्गौला र मुटमा समेत असर गर्दछ ।

‘लू’ बाट जोगिन के गर्ने ?

-धेरै पानी पिउने,

– बाहिर निस्किनै परे छाता ओड्ने वा पातलो कपडाले टाउको छोप्ने,

-हल्का खालको कपडा वा सुतीको कपडा लगाउने,

– खेतबारीमा कामकाज बिहान वा बेलुका गर्ने,

– चिसो पानीले नुहाउने,

– कागती पानी, नरिवल पानी तथा फलफूलको रस पिउने,

-फलफूल, काँक्रालगायत घरमा बनाएको ताजा खाना खाने,

के नगर्ने ?

– दिउँसो सकभर घर बाहिर ननिस्कने

– भान्सामा धेरै समय नबस्ने

– मदिरा सेवन नगर्ने