स्वास्थ्यसमाचार/ तिलोत्तमा नगरपालिकामा पाठेघरको मुखको क्यान्सर विरुद्धको एचपीभी (ह्युमन पापिलोमा भाइरस) खोप सम्बन्धी कार्यपालिका सदस्यहरुसँग विशेष अन्तरक्रिया कार्यक्रम सम्पन्न भएको छ।
कार्यक्रम तिलोत्तमा नगरपालिकाका नगरप्रमुख रामकृष्ण खाँणको अध्यक्षतामा भव्य रूपमा सम्पन्न भएको हो। कार्यक्रममा पाठेघरको मुखको क्यान्सर र त्यस विरुद्धको प्रभावकारी खोपका बारेमा गहिरो छलफल गरिएको थियो।
नगर प्रमुख खाणले पाठेघरको मुखको क्यान्सर नेपालमा महिलाहरूको प्रमुख स्वास्थ्य चुनौती बनेको उल्लेख गर्दै यसका रोकथामका उपायहरूमा विशेष ध्यान दिनुपर्ने बताउनुभयो। उहाँले नगरपालिकाभित्रका सम्पूर्ण लक्षित बालिकाहरूलाई एचपीभी खोप सुनिश्चित गर्ने प्रतिबद्धता व्यक्त गर्नुभयो।
नेपाल सरकारले यस वर्ष देशभर १६ लाख किशोरीहरूलाई एचपीभी खोप दिने लक्ष्य राखेको छ। सोही अनुसार तिलोत्तमा नगरपालिकाभित्र कक्षा ६ देखि १० सम्म अध्ययन गर्ने छात्राहरु तथा विद्यालय बाहिर रहेका १० देखि १४ वर्ष उमेर समूहका बालिकाहरूलाई खोप दिने कार्यक्रम तय गरिएको छ।
बिश्व क्यान्सर दिवस (माघ २३) देखि फागुन ६ गतेसम्म नगरपालिकाभित्रका विद्यालयहरूमा खोप कार्यक्रम सञ्चालन गरिने प्रावधानलाई टेकेर तिलोत्तमामा भने फागुन १ गते देखि ६ गतेसम्म खोप अभियान शुरु हुनेछ।
नगरपालिकाका स्वास्थ्य शाखा प्रमुख ज्ञान प्रसाद पौडेलका अनुसार नगरपालिकाभित्रका जम्मा ८ हजार ६ सय ३२ जना बालिकालाई खोप प्रदान गरिनेछ। नेपाल सरकारले चिनियाँ कम्पनी इनोभेक्सले उत्पादन गरेको ‘सिकोलिन’ खोप विश्व स्वास्थ्य संगठन (WHO) बाट मान्यता प्राप्त भएको र गाभीको सहयोगमा सरकारले सह-लगानी गर्दै निःशुल्क उपलब्ध गराउने व्यवस्था गरेको छ।
सरकारी स्वास्थ्य संस्थाहरूमा यो खोप निःशुल्क उपलब्ध गराइनेछ भने निजी स्वास्थ्य संस्थाहरूमा १०,००० रुपैयाँ शुल्क लाग्ने व्यवस्था गरिएको छ। सरकारी रूपमा यो खोपको मूल्य ६,५०० रुपैयाँ तोकिएको छ।
नेपालमा हरेक वर्ष २,१७९ जना महिलालाई पाठेघरको मुखको क्यान्सर हुने अनुमान गरिएको छ भने १,३१३ जना महिलाको मृत्यु हुने तथ्यांक रहेको छ। यो क्यान्सर ह्युमन पापिलोमा भाइरस (एचपीभी) का कारण लाग्ने गर्दछ। यसबाट बच्नका लागि जनचेतना फैलाउने, सुरक्षित यौन व्यवहार अपनाउने र एचपीभी खोप लगाउने मुख्य उपायहरू रहेका छन्।
उक्त कार्यक्रममा नगरपालिकाका जनप्रतिनिधिहरू, स्वास्थ्यकर्मीहरूको उल्लेखनीय सहभागिता रहेको थियो। वडा अध्यक्ष तथा कार्यपालिका सदस्य गणेश पाठक, कृष्ण प्रसाद पौडेल, झविलाल भुसाल , सुरेन्द्र श्री लगायतका सहभागीहरूले खोपको प्रभावकारिता, लक्षित समूह, सम्भावित साइड इफेक्ट तथा यसलाई सफलतापूर्वक कार्यान्वयन गर्न आवश्यक उपायहरूको बारेमा छलफल गरेका थिए ।
यस खोप अभियानले पाठेघरको मुखको क्यान्सरको दर घटाउन महत्वपूर्ण योगदान गर्ने विश्वास गरिएको छ। नगरपालिकाले सम्पूर्ण लक्षित बालिकाहरूलाई खोप सुनिश्चित गर्न अभिभावकहरूको सहकार्य र व्यापक जनचेतना आवश्यक रहेकोमा जोड दिएको छ।
प्रतिकया दिनुहोस्