ऐजेन्सी/मोटोपनाको समस्याले कम उमेरमानै प्याङ्क्रियाटिक क्यान्सरको खतरा बढाउने अध्यनले देखाएको छ। ५० वर्षभन्दा कम उमेरका मानिसहरूमा मोटोपनका कारण प्याङ्क्रियाटिक क्यान्सरको जोखिम २० प्रतिशतले बढ्न सक्ने एक अनुसन्धानले देखाएको हो।
हालै ओहायो स्टेट युनिभर्सिटीको वेक्सनर मेडिकल सेन्टरका अन्वेषकहरूले गरेको अध्ययनले प्याङ्क्रियाटिक रोगले वृद्धहरूलाई मात्र असर गर्छ र यो जोखिम कम गर्न उनीहरूले केही गर्न सक्दैन भन्ने हाल सम्मको तथ्यमा परिवर्तन आएको र बर्षेनी कम उमेरमै प्याङ्क्रियाटिक क्यान्सर हुने दर बढ्दै गएको देखाएको हो।
प्याङ्क्रियाटिक क्यान्सरको दर बर्सेनि एक प्रतिशतका दरले बढिरहेको छ र ४० वर्षभन्दा कम उमेरका मानिसहरूमा यो रोग नियमित रूपमा देखिरहेको युनिभर्सिटीकी जोबेदा क्रुज–मोनसेरेटले भनिन् । यो चिन्ताकारी प्रवृत्ति भएको र यस्तो किन भइरहेको छ भनेर पत्ता लगाउन यसबारे अनुसन्धान आवश्यक रहेको उनको भनाइ छ।
अध्ययनको लागि, टोलीले अक्टोबर ४ देखि अक्टोबर ७ सम्म अमेरिकामा १ हजार ४ जना उत्तरदाताहरूको नमुना सर्वेक्षण गरेको थियो । सहभागीहरूलाई प्याङ्क्रियाटिक क्यान्सरको जोखिम कारकहरूबारे सोधिएको थियो । ५० वर्ष मुनिका ५३ प्रतिशत वयस्कहरूले रोगको प्रारम्भिक सङ्केत वा लक्षणहरू पहिचान गर्न नसक्ने बताए।
३७ प्रतिशत भन्दा बढीले प्याङ्क्रियाटिक क्यान्सरको जोखिम बदल्न आफूले केही गर्न सक्दिन भन्ने मानेका थिए।यस्तै ३३ प्रतिशत मानिसहरूले भने बढी उमेरका मानिस मात्रै यसको जोखिममा छन् भन्ने धारणा राखेका थिए प्याङ्क्रियाटिक क्यान्सरको जोखिम कम गर्ने सुरुआत स्वस्थ तौल कायम राखेर गर्न सकिने क्रुज–मोनसेरेटले बताए।
मोटोपनाकै कारण व्यक्तिको प्याङ्क्रियाटिक क्यान्सरको जोखिम २० प्रतिशतले बढ्ने पाइएको छ। केवल १० प्रतिशत प्याङ्क्रियाटिक क्यान्सरहरू मात्रै आनुवंशिक जोखिम (परिवारका सदस्यहरूमा सर्ने) सँग सम्बन्धित रहेको अमेरिकन क्यान्सर सोसाइटी (एसीए)को अनुमान छ । हामी आफ्नो जिन बदल्न सक्दैनौँ । तर जीवनशैली भने परिवर्तन गर्न सक्छौँ । मोटोपना कम गरेर प्याङ्क्रियाटिक क्यान्सरको जोखिम कम गर्न सक्छौँ।
प्रतिकया दिनुहोस्