रुपन्देहीका प्रहरी कर्मचारीलाई युसीएसएमले स्वास्थ्य सेवामा छुट दिने

स्वास्थ्यसमाचार/ जिल्ला प्रहरी कार्यालय रुपन्देही र युनिभर्सल कलेज अफ मेडिकल साइन्सेज शिक्षण अस्पताल (सीएमसी) बीच प्रहरी कर्मचारीलाई स्वास्थ्य उपचार सेवामा छुट दिने सहमति भएको छ ।

मंगलबार सिद्धार्थनगर नगरपालिका–१२ स्थित जिल्ला प्रहरी कार्यालयमा आयोजित कार्यक्रममा रुपन्देही प्रहरी प्रमुख (एस.पी.) भरत बहादुर वि.क. र एमबीबीएसका प्रमुख कार्यकारी अधिकृत अजय कुमार पी.एस.ले सम्झौता पत्रमा हस्ताक्षर गरेका हुन् । हस्ताक्षर पश्चात सम्झौता पत्र आदानप्रदान गरिएको थियो ।

रुपन्देही जिल्लामा कार्यरत बहालवाला प्रहरी कर्मचारी तथा उनीहरुसँग आश्रित परिवारका सदस्यहरुको स्वास्थ्य उपचार सेवामा छुट दिने सम्झौतापत्रमा उल्लेख भएको जिल्ला प्रहरी कार्यालय रुपन्देहीका प्रहरी निरीक्षक किशोर के.सी.ले बताए ।

सीएएमसीले सामाजिक उत्तरदायित्व बहन गर्न तथा प्रहरी कर्मचारीहरुको मनोबल उच्च राखी हौसला प्रदान गर्न सुविधा उपलब्ध गराउने कार्यक्रम सञ्चालन गरिएको प्रहरी निरीक्षक के.सी.ले बताए ।

जिल्ला प्रहरी कार्यालय रुपन्देहीका प्रमुख प्रहरी उपरीक्षक भरत बहादुर वि.क.को अध्यक्षता, सीएमसी भैरहवाका प्रमुख कार्यकारी अधिकृत अजय कुमार पी.एस.को प्रमुख आतिथ्यता, एमबीबीएसका मेडिकल सुपरिटेण्डेण्ट प्रा.डा. सदन मुखी र अस्पतालका प्रशासन संयोजक एवं क्याम्प कोअर्डिनेटर तेज के.सी.को विशेष आतिथ्यतामा कार्यक्रम सम्पन्न भएको थियो ।