स्वास्थ्यसमाचार/ डेमोक्रेटिक रिपब्लिक अफ कङ्गोमा फैलिएको इबोला संक्रमणका कारण मृत्यु हुनेको संख्या ८० नाघेको छ । रोगको संक्रमण तीव्र रूपमा फैलिन थालेपछि विश्व स्वास्थ्य सङ्गठन (डब्लुएचओ) ले अन्तर्राष्ट्रिय सार्वजनिक स्वास्थ्य आपतकाल घोषणा गरेको छ ।
स्वास्थ्य अधिकारीहरूका अनुसार हालसम्म ८८ जनाको मृत्यु भइसकेको छ भने ३ सयभन्दा बढी व्यक्तिमा संक्रमणको आशंका गरिएको छ । संक्रमण नियन्त्रणभन्दा बाहिर जान सक्ने जोखिम बढ्दै गएपछि स्वास्थ्य निकायहरू थप सतर्क बनेका छन् ।
कङ्गोका स्वास्थ्य मन्त्रीले इबोलाविरुद्ध प्रभावकारी खोप उपलब्ध नभएको बताएका छन् । इबोलाको मृत्यु दर अत्यन्त उच्च रहने भएकाले संक्रमितमध्ये करिब आधासम्मले ज्यान गुमाउन सक्ने चेतावनी दिइएको छ ।
प्रकोप प्रभावित क्षेत्रमा उपचार केन्द्र र आइसोलेसन कक्षको अभाव देखिएको स्थानीय बासिन्दाले बताएका छन् । पर्याप्त स्वास्थ्य सेवा नपाउँदा धेरै बिरामी घरमै मृत्यु भइरहेको जनाइएको छ, जसले संक्रमण थप फैलिने जोखिम बढाएको छ ।
यो प्रकोप कङ्गोको इटुरी क्षेत्रमा सुरु भएको हो । उक्त क्षेत्र युगान्डा र दक्षिण सुडानसँग सीमा जोडिएको संवेदनशील क्षेत्र मानिन्छ । प्रारम्भिक संक्रमित एक स्वास्थ्यकर्मी रहेको विवरण सार्वजनिक गरिएको छ ।
संक्रमण नियन्त्रणका लागि विभिन्न अन्तर्राष्ट्रिय स्वास्थ्य सहायता संस्थाहरूले चिकित्सक टोली, औषधि तथा आवश्यक सामग्री पठाउने तयारी गरिरहेका छन् । विश्व स्वास्थ्य सङ्गठनले छिमेकी देशहरूलाई समेत उच्च सतर्कता अपनाउन आग्रह गरेको छ ।
प्रतिकया दिनुहोस्