स्वास्थ्यसमाचार/ लुम्बिनी प्रादेशिक अस्पताल, बुटवलले स्वास्थ्य सेवा प्रवाहलाई सहज बनाउन करार सेवाबाट जनशक्ति भर्ना प्रक्रिया सुरु गरेको छ। अस्पतालले असोज २३ गते सार्वजनिक गरेको सूचनाअनुसार पाँचौं तह र चौथो तहका विभिन्न पदहरूमा अस्थायी नियुक्तिका लागि दरखास्त आह्वान गरिएको हो।
अस्पतालका अनुसार लामो समयदेखि स्थायी दरबन्दी नपुगेका कारण सेवा सञ्चालनमा समस्या हुँदै आएको छ। बिरामीको चाप बढ्दै जाँदा तत्काल जनशक्ति आवश्यक भएको र करार प्रणालीबाट अस्थायी रूपमा कर्मचारी नियुक्त गर्न लागिएको अस्पतालले जनाएको छ।
माग भएका पदहरू
अस्पतालले करार सेवाका लागि निम्न पदहरूमा दरखास्त आह्वान गरेको छ—
स्टाफ नर्स (पाँचौं तह)
ल्याब टेक्निसियन (पाँचौं तह)
रेडियोग्राफर (पाँचौं तह)
अहेब (चौथो तह)
एएनएम (चौथो तह)
फार्मेसी सहायक (चौथो तह)
यी पदहरू अस्पतालको दैनिक सेवा र आपतकालीन उपचार प्रणालीमा अपरिहार्य मानिएका छन्। विशेषगरी मातृशिशु, ल्याब, फार्मेसी र रेडियोलोजी सेवामा जनशक्ति अभाव बढी देखिएको अस्पताल प्रशासनले जनाएको छ।
दरखास्त प्रक्रिया
इच्छुक उम्मेदवारले शैक्षिक योग्यता, अनुभव प्रमाणपत्र, नागरिकताको प्रतिलिपि र सम्पर्क विवरणसहित दरखास्त पेस गर्नुपर्नेछ। दरखास्त इमेलमार्फत पनि पठाउन सकिने व्यवस्था गरिएको छ।अस्पतालले दरखास्त पठाउने इमेल ठेगाना [email protected]
तोकेको छ।
सूचना प्रकाशित भएको मितिबाट १५ दिनभित्र दरखास्त पेस गर्नुपर्नेछ। तोकिएको म्यादपछि प्राप्त दरखास्तहरू स्वीकृत नहुने अस्पतालले स्पष्ट पारेको छ।
सेवा विस्तारमा सहजता
अस्पतालका अधिकारीका अनुसार लुम्बिनी प्रादेशिक अस्पताल प्रदेशकै प्रमुख स्वास्थ्य संस्था भएकाले यहाँको सेवा दायरा निरन्तर बढ्दै गएको छ। बिरामीको संख्या बढेसँगै आपतकालीन सेवा, सर्जरी र मातृशिशु उपचारमा जनशक्ति अभावले चुनौती थपिएको छ।
“करार सेवाबाट जनशक्ति व्यवस्थापन भएपछि सेवामा सहजता आउनेछ,” अस्पतालका प्रशासन प्रमुख प्रेम गौतमले भन्नु भयो , “नयाँ जनशक्ति आएपछि बिरामीलाई अझ गुणस्तरीय उपचार दिन सकिने अपेक्षा छ।”
भविष्यमा स्थायी दरबन्दीको योजना
अस्पतालले स्थायी दरबन्दीका लागि प्रदेश सरकारसँग निरन्तर समन्वय भइरहेको जनाएको छ। तत्कालका लागि करार प्रणालीले तत्कालीन आवश्यकता पूरा गर्ने भए पनि दीर्घकालीन रूपमा स्थायी दरबन्दी विस्तार आवश्यक रहेको गौतमको भनाइ छ।
लुम्बिनी प्रादेशिक अस्पतालले पछिल्ला वर्षहरूमा ट्रमा सेवा, मातृशिशु स्वास्थ्य, ल्याब तथा सर्जिकल युनिट विस्तार गरी प्रदेशकै अग्रणी अस्पतालका रूपमा आफ्नो क्षमता बलियो बनाउँदै आएको छ।
प्रतिकया दिनुहोस्