स्वास्थ्यसमाचार/ आफ्नो उम्मेद्धारी खारेज गर्ने निर्वाचन आयोगको निर्णय विरुद्ध डा तोसिमा कार्की अदालत जाने भएकी छन् । आगामी ४ मंसिरमा हुने प्रतिनिधि सभाको निर्वाचनका लागि राष्ट्रिय स्वतन्त्र पार्टीको तर्फबाट ललितपुर क्षेत्र नं ३ बाट उम्मेद्धार बनेकी डा कार्की नेपाल मेडिकल काउन्सिलको निर्वाचित सदस्य समेत हुन् ।
निर्वाचन आयोगले काउन्सिलको सदस्य पदलाई लाभको पद भनेर व्याख्या गर्दै डा कार्कीको उम्मेद्धारी खारेज गरिदिएको हो ।डा कार्कीले भने मेडिकल काउन्सिलको सदस्य पद लाभको पद नहुने जिकिर गरेकी छन् ।
उनले सो विषयमा न्याय क्षेत्रमा क्रियाशिल अधिवक्ताहरुसंग परामर्श गरेको र उम्मेद्धारी दिनु २५ दिन अघि नै निर्वाचन आयोगसंग सोधेको समेत उल्लेख गरेकी छन् । उनले शनिबार सामाजिक सञ्जालमा लामो स्टाटस लेख्दै निर्वाचन आयोगको निर्णय प्रति असन्तुष्टी व्यक्त गरेकी छन् ।
यस्तो छ उनको भनाई
आधिकारिक पत्र नपाए पनि समाचारमा म तोसिमा कार्कीको ललितपुर क्षेत्र नं ३ को उम्मेदवारी खारेजीको बारेमा जानकारी पाएको छु । यसबारे प्रष्ट पार्न यो स्टाटस पोस्ट गर्दैछु ।
निश्चित तलब नहुने, बैठकमा उपस्थित हुँदा बैठक भत्ता मात्रै पाउने र निर्वाचित सदस्य भएकाले नेपाल मेडिकल काउन्सिलको सदस्य पद लाभको पद नहुने धारणा रहेको छ । यद्यपि त्यसमा थप स्पष्ट हुन मैले न्यायक्षेत्रमा क्रियाशिल रहेका अधिवक्ताहरुसँग परामर्श गरेको थिएँ ।
उहाँहरु सबैबाट मासिकरुपमा पारिश्रमिक नआउने कुनै पनि पद लाभको पद नरहने सुझाव पाएँ । २०७९(०५(२८ मितिमा ९मनोनयनको २५ दिन अगाडी नै० एक सचेत र जिम्मेवार उम्मेदवारको भुमिका निभाउदै निर्वाचन आयोगको कार्यालयमा पत्र लेखेर नेपाल मेडिकल काउन्सिलको सो पद लाभको पद हुने वा नहुने बारेमा स्पष्ट पारिदिन निवेदन समेत दिएको थिएँ
तर निर्वाचन आयोगले सो निवेदनलाई जवाफ दिन आवश्यक पनि मानेन ।यसैले कानुनमा जरुरी नभएको तथा ४ हजार जति सदस्यहरुको मतले नीतिनिर्माणमा पुगेकोले ति मतहरुलाई घात नगर्न पनि मैले नेपाल मेडिकल काउन्सिलको सदस्य पदबाट राजिनामा दिन हुन्न भन्ने मेरो निष्कर्ष रह्यो ।
समय सकिए पछिको उजुरीलाई आधार मानेर आफैले समयमा प्रष्ट नपारेको निवेदनका बारेमा नखुली अहिले आएर सोही बिषयमा निर्णय गर्नुमा निर्वाचन आयोगको निष्पक्ष निर्णय हो भन्नेमा शंका गर्दछु । जसरी उजुरी समय पछि आए पनि निर्णय गरियो, त्यसरी नै मैले उम्मेदवारी दर्ता गर्नु भन्दा निकै पहिले दिएको निवेदनउपर पनि निर्णय गर्नु पर्थ्यो । यहाँनेर पनि निर्वाचन आयोगको निष्पक्षतामा शंका उब्जिन्छ ।
स्पष्टिकरण दर्ता गर्दा सर्वोच्च अदालतको नजिर पनि समावेश गरिएकोमा सोप्रति कुनै अभिलेखिकरणसम्म नगरि निर्णय गर्नु थप शंकास्पद हुन आउँछ ।
ललितपुर ३ मा मेरो पक्षमा एकदमै राम्रो माहौल सिर्जना भइरहेको अवस्थामा निर्वाचन परिणाम फरक पार्ने गरि आएको यो किसिमको निर्णयका विरुद्ध म सम्मानित अदालत जानेछु । सम्पूर्ण मेरा समर्थक तथा शुभचिन्तकज्यूहरुलाई कत्ति पनि विचलित नभई उच्च मनोवलले साथ निरन्तर दिनहुन अनुरोध पनि गर्न चाहन्छु्।
डा तोसिमा कार्की
ललितपुर ३
प्रतिकया दिनुहोस्